Sa'at u kuxtal Stan Lee, leti'e' máax patjo'olt Hombre Araña

95 u ja'abil ka'achij

Sputnik
Oochelo'ob spiderman.wikia.com
K'iintsil

Los Ángeles, Estados Unidos
Martes 13 ti' noviembre, 2018

Tu k’iinil jo’oljeake’, sa’at u kuxta’al Stan Leee’, u yuumil yéetel u patjo’olil jejeláas cómics jach k’ajóolta’ano’ob, le je’ela’ úuch ti’ jump’éel kúuchil ts’ak yaj p’aatal tu noj kaajil Los Ángeles, 95 u ja’abil ka’achij, beey úuchik u k’a’ayta’al ti’ u kúuchil Internet TMZ, je’el bix úuchik u k’a’aytal xan tumen u yaal.

Leee’ tu múul beetaj superhéroes jach k’ajóolta’ano’ob je’el bix Hombre Araña, Hulk, el Hombre de Acero yéetel Vengadores.

P’el úuchik u ts’íibta’al ba’ax úuche’, tu jach séeba’anil úuchik u k’i’itpajal ti’ redes sociales tumen máaxo’ob jach t’u’ulpachtik Lee, máax tu múul ts’íibtaj yéetel Jack Kirby u jejeláasil tsikbalil superhéroes.

James Wan, máax jo’olbesik cha’anilo’ob saajkil yéetel Aquaman, jump’éel u molcha’anil superhéroes ti’alinta’an tumen editorial DC Comics, le ku jach ketikubáaj yéetel Marvel, yaan u ts’a’abal k’ajóoltbil diciembre, tu ts’íibaj ti’ u kúuchil Twitter: "Ka je’elek juntúul j k’ajla’ayil máak. In táankelmile’ jach k’expaj ta wóok’olal. Kin jach níib óoltik úuchik u k’ajóoltik u máakil, beyxan úuchik u páajtal in wa’alik ti’ beyka’aj kin níib óoltik u meyaj”.

Lieber u chuuka’anil u k’aaba’ Leee’, síij tu k’iinil 28 ti’ diciembre ti’ u ja’abil 1922, tu noj kaajil Nueva York. Tu ja’abil 1939e’ káaj u meyajtik cómics, ma’ xáanchaje’ ka k’uch ti’ u editorialil Timely Comics, mola’ay súut beey Marvel tu paachil k’iin.