Máasewáal múuch'kabilo'obe' ma'atáan u éejentiko'ob tren maya

De la Redacción
Oochel Infografía
K'iintsil

Lunes 19 ti' noviembre, 2018


Múuch’kabilo’ob yéetel máasewáal kaajo’ob yano’ob tu petenil Yucatáne’ ku ya’aliko’obe’ ma’atáan u éejentiko’ob u k’áatchi’ita’al mix u beeta’al Tren Maya, tukulta’an u meyajta’al tumen u túumben jala’chil Andrés Manuel López Obrador.

“Ma’ uts ti’ k t’aan tumen ku jach loobiltik u páajtalil maaya’ob tumen to’on le je’elo’obo’, ts’o’okole’ k páajtalilo’obe’ jets’a’ano’ob xan ti’ U Almejen Noj A’almajt’aanil u Múuch’ Péetlu’umilo’ob México”, tu ya’alajo’ob.

Leti’obe’ tu yaj óoltajo’ob tu yojéeltajo’ob ba’ax ku beetbil yéetel le chimes k’áak’o’, chéen tumen tu yu’ubajo’ob péektsilo’ob yéetel tsikbalo’ob, máaxo’ob ku líik’siko’ob t’aane’ ku k’áatiko’ob bolonp’éel ba’al, ichil le je’elo’obo’ ti’ yaan ka je’ets’ek u beeta’al tsikbalo’ob yéetel xaak’alilo’ob ti’ le petenila’, yéetel uláak’ jump’éel tu’ux ka táakbesa’ak óoxp’éel noj lu’umo’ob (Quintana Roo, Campeche y Yucatán) “ti’al ka jach ila’ak ka beeta’ak ba’al je’el bix jets’a’an te’e a’almaj t’aano’”, tu jets’ajo’ob.

Ichil múuch’kabilo’ob ku líik’siko’ob t’aane’ ti’ yaan Consejo Regional Indígena y Popular de Xpujil SC, Prodiversa AC, Red de Productores de Servicios Ambientales Ya’ax Sot’ Ot’ Yook’ol Kaab AC, Colectivo de Comunidades Mayas de los Chenes yéetel Consejo Indígena de Astata, ichil uláak’o’ob.