Cámara de Diputadose' tu jets'aj u yantal a'almaj t'aan éejentik u beeta'al INPI

De la Redacción
Oochelo'ob ch’a’aban Facebook IrmaJuanC
K'iintsil

Viernes 23 ti' noviembre, 2018

Cámara de Diputadose’ tu jets’aj, yéetel 430 yéeyajilo’ob ti’al u éejenta’al, mix jump’éel ti’al ma’ u beeta’al yéetel jump’éel ma’ oota’ab yéeya’ali’, u ju’unil tu’ux ku je’ets’el Ley del Instituto Nacional de Pueblos Indígenas, tu’ux ku chíimpolta’al máasewáal yéetel afromexicano kaajo’ob beey sujetos de derecho público.

Ju’une’ ku ya’alike’, unaj u páajtal u je’ets’el tumen kaajo’ob bix u k’áato’ob ka úuchuk ba’al, yaan u yantal u páajtalil ti’ob ti’al u ya’aliko’ob bix u k’áato’ob kuxtal, ba’ale’ yaan u táanilkunsa’al k’ajla’ayil, ch’i’ibalil yéetel u tuukul kaaj.

Ts’íib tu’ux je’ets’ Ley de la Comisión Nacional para el Desarrollo de los Pueblos Indígenas, ts’o’ok u máansa’al tu k’ab Senado de la República ti’al u beeta’al u a’almaj t’aanil je’el bix k’a’abéete’.

Túumben a’almaj t’aane’ ku jet’sik u beeta’al Instituto Nacional de Pueblos Indígenas, beey jump’éel mola’ay jumpáay bíin yanak ti’ Administración Pública Federal, yaan u ts’a’abal u muuk’, yaan u páajtal u meyaj je’el bix u k’áate’ yéetel yaan xan u ts’a’abal u taak’inil ti’al ka páatak u beeta’al meayjo’ob, ti’ ku yantal Ciudad de México.

Máax jo’olbesik Comisión de Pueblos Indígenas, diputada Irma Juan Carlos (Morena), tu k’a’aytaj u beeta’al yéetel tu ya’alaje’, tu lu’umil Méxicoe’, k’uch u k’iinil u táanilkunsa’al máasewáalo’ob yéetel afromexicano’ob, yaan u yu’ubalo’ob yéetel yaan u jeel chíimpolta’alo’ob.

Yéetel mola’aye’, tu ya’alaj, yaan u kaxta’al ka xi’ik utsil ti’ kaajo’ob je’el bix úuch yanako’ob, ts’o’okole’ tukulta’an ti’al ka páatak u laj kuxtal kaaj. K’a’anan u je’ets’el yéetel u táakbesa’al kaaj ti’al u tukulta’al yéetel u beeta’al nu’ukbesjao’ob ti’ u jejeláasil mola’ayo’ob jala’ach, ti’al ma’ u tse’elel mix jump’íit ba’al ti’ u páajtalil máasewáal kaajo’ob yéetel ti’al u kaxta’al u jóok’ol táanil.

Tukulta’ane’, mola’aye’ yaan u jets’ik, u patjo’oltik, u beetik, u ts’áak yóok’ol bej, u múul meyajtik, u péektsiltik, u yilik ka beeta’ak yéetel u xak’altik a’almaj t’aano’ob, nu’ukbesajo’ob, meyajo’ob yéetel tuláakal ba’al yaan u yeel yéetel u páajtalil máasewáal kaajo’ob, je’el bix xan u bin utsil ti’ob, u mu’uk’ankúunsa’al u miatsilo’ob yéetel u yóolo’ob.