Romae' ch'a'achibta'an beey Mejor Película Extranjera ichil u chíimpolalo'ob Globos de Oro

Notimex
Oochel Fotograma de la película
K'iintsil

Ciudad de México
Viernes 7 de diciembre, 2018

U cha’anil Roma, beeta’an tumen mexicanoil Alfonso Cuarón ch’a’achibta’an ti’al u chíimpolta’al beey Mejor Película Extranjera ichil Premios Globo de Oro 2019, yaan u k’u’ubul tu winalil enero ku taala’.

Úuchik u k’a’ayata’al tumen Asociación de la Prensa Extranjera de Hollywood (HFPA) máaxo’ob ch’a’achibta’an ti’al u beeta’al u 76 u téenal Globos de Oro, tu’ux ku chíimpolta’al u asab ma’alo’obil cha’an beeta’an ti’ cine yéetel televisióne’, láayli’ xan k’a’ayta’ab cha’ane’ ch’a’abchibta’an ti’al u jaatsil Mejor Guión yéetel Mejor Director, tu yóok’olal máax jo’olbes u beeta’al, Alfonso Cuarón.

Chowak cha’an beeta’an tumen mexicanoile’ keetel yanik yéetel Capernaum, beeta’an tumen Nadine Labaki (Francia); Girl, beeta’an tumen Lukas Dhont (Bélgica); Never Look Away, beeta’an tumen Florian Henckel (Alemania); yéetel Shoplifters, beeta’an tumen Hirokazu Kore-eda (Japón).

Romae’, ts’o’ok u yáax chíimpolta’al yéetel León de Oro ichil u cha’anil Festival de Cine de Venecia, yéetel chíimpolta’an xan ti’ Premios Círculo de Críticos de Cine ti’ u lu’umil Nueva York, ts’o’okole’ yaan u chikbesik México ti’ Premios Oscar yéetel Premios Goya.

Alfonso Cuaróne’, leti’e’ ka’atúul mexicano máax u náajaltmaj u jach k’a’ananil chíimpolal ku k’u’ubul tumen Festival Internacional de Cine de Venecia, úuchik u ts’a’abal ti’ León de Oro.

Cha’ane’ táabsa’ab chéen sak yéetel boox, u tuukile’ ka chikpajak bix yanik kuxtal ti’ u ja’abilo’ob 70, k’iin úuchik u yantal ya’abach político k’eexilo’ob, beyxan jelpaj ba’al ti’ miatsil yéetel ti’ bix kuxlik kaaj, ku chikbesik bix u máan kuxtal ti’ jump’éel baatsil ma’ ayik’ali’, ba’ale’ ma’ xan óotsili’, ba’ale’ múuch’ yaniko’ob tumen ichilo’obe’ ti’ yaan Cleo, chikbesa’an tumen Yalitza Aparicio, juntúul x mixteca ko’olel ku meyaj ich naj.

Nancy Garcíae’ ku kuxkíinsik Adela, uláak’ juntúul x meyajil láayli’ x mixtecail, ku yáantik yéetel ku láak’intik Cleoe’; ka’alikil u yuumil naje’, Sofía, beeta’an tumen Marina de Tavira, ku yilik bix u jóok’ol táanil tumen mina’an u yíicham.

Óoxtúul ko’olelo’obe’ “ku beetiko’ob jump’éel túumben tuukul ti’ bix u na’atal yaabilaj yéetel láak’inajil, ichil jump’éel tsoolil ti’ bix unaj u yantal kaaj, tu’ux jiit’il ba’al ichil u ch’i’ibal wíinik yéetel beyka’aj taak’in yaan ti’ máak”, beey u ya’alik u kóom ts’íibil cha’an.

Máaxo’ob ku táakpajalo’obe’, ti’ kaja’ano’ob ti’ baantail Roma, naats’ ti’ u k’íiwikil U Noj Kaajil México, tu k’iinilo’ob k’eexilo’ob, tu’ux jelpaj u kuxtal kaaj yéetel tu beetaj u péek ba’al ti’ bix yanik ba’al te’e noj lu’uma’.