Béeychaj u ch'a'abal jayp'éel úuchben nu'ukulo'ob yano'ob ka'ach ichil museo eelnaj tu lu'umil Brasil

Maanal ti' 20 millonesil nu'uklo'ob yaan ka'achili'

La Jornada Maya
Oochel Afp
K'iintsil

Río de Janeiro, Brasil
12 ti' diciembre, 2018

Aj xak’al xooko’ob ti’ u kúuchil Museo Nacional de Brasil tu ya’alajo’obe’ páatchaj u jeel ch’a’ako’ob maanal ti’ mil 500 u p’éel nu’ukulo’ob jp’áat úuchik u yelel kúuchilo’ob tu’ux yaano’ob ti’ p’aatal tu noj kaajil Río de Janeiro, tu k’iinil 2 ti’ septiembre máaniko’. Ichil úuchben nu’ukulo’ob jel ch’a’abe’ ti’ yaan máasewáal julte’, jump’éel peruanoil p’úul yéetel jump’éel precolombinail máaben (chika’an te’e oochelo’oba’), beey úuchik u ya’alal tumen agencia Ap. Octubre máaniko’ páatchaj u ch’a’abal tuka’atéen u baakel Luzia, k’aaba’ jts’a’ab ti’ u baakel juntúul ko’olel kuxlaj kex 11 mil 500 ja’abo’ob paachil. Ba’ax k’a’ayta’ab tu k’iinil ka’awjeak, yéetel xan k’a’aytajik beeta’ab tu’ux je’ets’ u noj lu’umil Alemaniae’ yaan u k’ubik 205 mil dólares ti’al ka páatak u ma’anal nu’ukulo’ob je’el u yáantajo’ob ti’al u ts’áatáanta’al ba’al. Museo yaan tu noj kaajil Río de Janeiro jump’éel ti’ le asab úuchben yano’ob ti’ yóok’ol kaab. Ma’ili’ eelnake’, maanal ti’ 20 millonesil ba’alo’ob yaan. Jo’olpóopo’obe’ láayli’ táan u beetiko’ob xaak’alo’ob ti’al u yojéelta’al ba’ax beet u jóopol k’áak’ te’elo’.

_____________________________________________________

Expertos del Museo Nacional de Brasil afirman haber recuperado más de mil 500 tesoros después del enorme incendio que afectó al edificio ubicado en Río de Janeiro el pasado 2 de septiembre. Las reliquias incluyen flechas indígenas, una vasija peruana y una urna fúnebre precolombina (en las imágenes), reporta la agencia Ap. El pasado octubre se recuperaron restos óseos de Luzia, nombre que le han dado al cadáver de una mujer que vivió hace unos 11 mil 500 años. Los avances fueron divulgados ayer, así como el anuncio de que Alemania donará 205 mil dólares para adquirir equipos de preservación de artefactos. El museo en Río de Janeiro es uno de los más antiguos del mundo. Tenía en su acervo más de 20 millones de objetos antes del siniestro. Las autoridades todavía investigan las las causas de esa tragedia cultural.