Ajedrez Maya, patjo'oltan tumen mexicanoilo'obe', ku yaajsik u na'at paalal yéetel táankelem: Luis Gaytán

Ts'íib yéetel oochel: Yolanda Aldana
K'iintsil

Jueves 13 ti' diciembre, 2018
Playa del Carmen, Quintana Roo

Luis Gaytán Iñestra, u jka’ansajil u báaxta’al Ajedrez Maya El Juego de los Dioses, ts’o’ok u k’uchul Playa del Carmen ti’al u péektsiltik báaxal patjo’olta’ab tumen máaxo’ob ku meyajo’ob ti’ Comunidad Científica Epistémica de México, tumen tukulta’abe’ no’ojan ti’al máax yaan jump’éel discapacidad, tumen je’el bin u kanik meyajto’obe’ yéetel je’el u páajtal u koniko’ob ti’al ka chan yanak taak’in ti’ob.

Tu tsikbaltaje’ ti’al ka báaxta’ake’, k’a’anan u tuukul máak yéetel u k’atik u bel le uláak’ máax ku báaxalo’, ts’o’okole’ geométrico u nu’ukulil u báaxta’al, patjo’olta’ab tumen arquitectos, diseñadores gráficos, sicologos yéetel pedagogos, ts’o’okole’ ti’ ku beeta’al ti’ jump’éel kaaj yaan naats’ ti’ u chúumukil u lu’umil México, ba’ale’ walkila’ chéen ti’ Internet ku páajtal u ma’anal.

Beey túuno’, Gaytán Iñestra, máax táakpaja’an xan ichil Federación Mexicana de Ajedrez Maya, tu ya’alaje’ ma’alo’ob u yantal le báaxal tu yotoh máak tumen yéetele’ ku páajtal u yajal u na’at mexicanoil paalal yéetel táankelemo’ob.

“Tene’ k’a’anan in péektsiltik le báaxala’ ti’ u noj kaajil Playa del Carmen, beeta’an tumen yéetel u ti’al mexicanoilo’ob, ts’o’okole’ ku péektsiltik maaya miatsil ti’ jejeláas lu’umo’ob tu’ux ku k’uchul. Míin je’el tak u páajtal u k’a’abéetkunsa’al tumen xoknáalo’ob beey material didáctico”, beey úuchik u ya’alik Luis Gaytán.

Tu tsikbaltaj Ajedrez Mayae’ ts’o’ok u káajal u báaxta’al ti’ lu’umo’ob je’el bix Bolivia, Brasil, Alemania yéetel España, tumen ku yutstal ti’ yich máak tumen ich tercera dimensión ku báaxta’al.

Beyxan tu tsikbaltaj ma’atáan u xáantal ken beeta’ak jump’éel meyaj ti’al u ts’a’abal k’ajóoltbil tu táan u jo’olpóopilo’ob kaaj, ti’al beyo’ u kaxta’al u ka’ansa’al u báaxta’al Ajedrez Maya ti’ kúuchilo’ob suuk u xíimbalta’al tumen kaaj.

Leti’e’ ts’o’ok u kaxtik u táakbesik báaxal ti’ jejeláas meyajo’ob táan u beeta’al te’e kaajo’, ti’ k’iimbesajo’ob yéetel cha’ano’ob je’el bix Feria Nacional de Ciencias e Ingeniería beeta’ab ti’ u kúuchil Planetario del Sayab, tu’ux láayli’ yaan jump’éel u múuch’il Ajedrez Maya, lalaj sábado yéetel domingo tu súutukil 13:00 horas yéetel ti’ u cha’anil Playa de Mi Esperanza, beeta’an tumen Ayuntamiento de Solidaridad lalaj fin de semana ti’ le winalil yano’ona’, ti’ u kúuchil Plaza 28, tu’ux ku táakpajal aj meyaj k’abo’ob, aj meyaj k’at, máaxo’ob beetik bisurtería, u nu’ukulilo’ob ki’ichpankúunsajil, máaxo’ob konik vegana janal, aj its’ato’ob yéetel aj paaxo’ob, ku múuch’ulo’ob las 5 tu taal u chíinil k’iin tak las 10 áak’ab.