Medalla Belisario Domínguez ti'al Carlos Payán, juntúul ti' le máaxo'ob patjo'olt 'La Jornada'

Andrea Becerril y Víctor Ballinas
Oochel La Jornada
K'iintsil

Ciudad de México
Viernes 14 ti' diciembre, 2018

Medalla Belisario Domínguez, leti’e’ asab nojoch chíimpolal ku k’u’ubul tumen Senado, yéetel te’e ja’aba’ yaan u k’u’ubul ti’ juntúul j ts’íib, máax tu beetaj xan u legisladoril yéetel máax xan beet u jo’olpóopil tu k’iinil úuchik u patjo’olta’al u pik’il ju’unil La Jornada, Carlos Payán Velver.

Junmúuch’ u máakilo’ob Morenae’ tu jets’aj tu ja’atskabil u k’iinil jo’oljeake’, u táakbesik u k’aaba’ Payán Velver ichil le jo’olajuntúul máak táan u ketikuba’ob ti’al u k’u’ubul ti’ob chíimpolal.

Máax beet u jo’olbesaj patjo’olil La Jornadae’ jt’a’an ti’al u k’amik chíimpolal ku k’u’ubul ja’ab man ja’ab tumen Senado, ti’ “máaxo’ob k’a’anan ba’al ku beetiko’ob ich kaaj, yéetel tumen chika’an u ts’áamaj u yóolo’ob ti’ ba’ax ku beetiko’ob yóok’olal u lu’umilo’ob ba’ale’ beyxan yéetel u yéet kaajilo’ob”, u k’aaba’e’ táakbesa’ab tumen senador u k’áatmaj licencia Germán Martínez Cázares yéetel tumen senador Félix Salgado.

Jo’oljeake’, ti’ jump’éel múuch’tambal jo’olbesa’ab tumen coordinador Ricardo Monreal, u ya’abil u senadoresil Morenae’ t’aanajo’ob uts ti’al u ka k’u’ubuk chíimpolal ti’ Payán Velver. Yanchaj jaytúul ichilo’obe’, je’el bix Napoleón Gómez Urrutia, máaxo’ob ch’a’achibt tuláakal meyaj beeta’an tumen máax jo’olbes patjo’olt La Jornada yéetel xan tu k’a’ajsajo’ob meyaj u beetmaj ti’al ka páataj u yantal libertad de expresión yéetel u beeta’al ba’ax unaj yéetel u páajtalil máak.

Martínez Cázares yéetel Félix Salgadoe’ tu ya’alajo’obe’ leti’e’ “juntúul uts mexikanoil, no’ojan wíinik, jeets’el u yóol yéetel kaambanaja’an, óoli’ mina’an máak beyo’”.

Beey túuno’, legisladoro’obe’ tu ch’a’ajo’ob jayp’éel u xóoxot’al t’aan yanchaj tu súutukil úuchik u k’u’ubul Doctorado Honoris Causa, tumen Universidad de Guadalajara, ti’ Payán Velver, tu ja’abil 2013.

Leti’e’ meyajnak ti’ El machete, kúuchil tu’ux ku k’a’aytal péekstilo’ob ti’ u múuch’kabil Partido Comunista Mexicano, ts’o’okole’ jayp’éel ja’abo’ob paachile’ jach ook tu pool u jets’ik u meyaj ti’ periodismo, le beetike’, tu beetaj u subdirectoril u pik’il ju’unil Uno más Uno".

Beyxan ju’un ts’íibta’ab ti’al u tso’olol ba’axten ti’ leti’ unaj u k’u’ubul chíimpolale’, ku ya’alik “táakpaj ti’ uláak’ jump’éel perodísticoil k’a’anan meyaj, ti’ u pik’il ju’unil La Jornada, tu’ux táakpaj beey juntúul ti’ le máaxo’ob patjo’olt yéetel tu beetaj xan u jo’opóopil lik’ul u k’iinil 19 ti’ septiembre ti’ u ja’abil 1984 tak 5 ti’ junio ti’ u ja’abil 1996”, ti’al beyo’ u jach je’ets’el “jump’éel ti’ le noj meyajo’ob yaan, tu’ux ku ya’alal ba’al je’el bix u yúuchul ti’ u lu’umil México, tumen óoli’ ts’o’ok óoxp’éel decada ma’ xóot’ok u beeta’ali’”.

A’alab xane’, le bix u t’aan Payán yóok’olal u páajtalil wíinike’ jump’éel ba’ax k’a’anan yéetel “ma’ tu páajtal u tu’ubtsal”. Najmal u k’a’ajsal meyaj tu beetaj tu k’iinilo’ob táan u beetik u senadoril tu ja’abilo’ob noventa. Táakpaj ti’ Comisión de Concordia y Pacificación (Cocopa), beeta’ab ti’ u ja’abil 1994, ti’al u kaxta’al ka páatak u yantal tsikbal yéetel u zapatistaos yanchaj xan te’e ja’abo’”.

Ku ya’alike’, meyaj ti’ periodismo beeta’an tumen Carlos Payán “ts’o’ok u chíimpolta’al ya’abach juntéenal”. Tu k’amaj Premio Nacional de periodismo Francisco Zarco, tu ja’abil 1992, k’u’ub ti’ tumen Universidad Juárez de Durango, yéetel premio especial de honor ti’ u ja’abilo’ob 1994 yéetel 1995, ku ts’a’abal tumen Club de Periodistas de México.

Walkila’ Payen Velver táan u jo’olbesik u múuch’kabil Consejo de Administración ti’ u corporativoil Argos, jump’éel ti’ le asab k’a’anan productorail yaan ti’ América latina. Beeyxan tu jo’olbesaj Centro de Estudios del Movimiento Obrero Socialista (CEMOS) yéetel láayli’ leti’ patjo’olt yéetel jo’olbes Consejo Editorial del Noticiero Revolución 3-0.

Táakpaj xan ti’ Consejo Consultivo de la Comisión Nacional de Derechos Humanos (CNDH), ti’ yanchaj ichil Academia de Derechos Humanos, táakpaj ti’ Consejo Editorial ti’ u pik’il ju’unil Memoria yéetel táaka’an xan ti’ Instituto del Derecho de Asilo Museo Casa León Trosky.

Leti’ xane’ tu beetaj u editoril ti’ u áanalte’ilob Taller Tiempo Extra Editores yéetel tu ts’íibtaj u áanalte’il k’aay tuukul Memorial del viento.