Chikbesa'ab Yalitza Aparicio tu táan wáalil u pik'il ju'unil Vogue México

Leti'e' yáax oxaqueañail ko'olel ku jach chikpajal Hollywood

Notimex
Oochel: Vogue
La Jornada Maya

Ciudad de México
Lunes 17 de diciembre, 2018

U pik’il ju’unil Vogue México ku káajsik ja’ab yéetel u yoochel juntúul ko’olel táan u ts’íibtik u k’ajla’ayil ichil u meyajil cha’an ku beeta’al Hollywood ti’ le k’iino’oba’, ts’o’okole’ leti’e’ no’ojan ti’al u náajaltak u noj chíimpolalil Oscar 2019.

X mexicanail Yalitza Aparicio, tu cha’aj u ch’a’abal u yoochel tumen Vogue yéetel u jats’uts búukinaj. Tsikbal tu beetaj yéetel pik’il ju’une’ chikpaj yéetel oochel ch’a’ab tumen Santiago & Mauricio, estilismoile’ beeta’ab tumen Pamela Ocampo yéetel u beetchajale’ j ila’ab tumen Regina Montemayor.

“Ki’imak in wóol in ts’áak k’ajóotlbil tu táan wáalil Vogue Méxicoe’ juntúul ko’olel chikbesik tuláakal u yóol México tu táan yóok’ol kaab”, beey úuchik u ya’alik Karla Martínez de Salas, máax beetik u Directorail Editorial ti’ Vogue México yéetel Latinoamérica.

“Táan u k’expajal tuukul jeets’a’an tu yóok’olal bix unaj u chikpajal máaxo’ob unaj u beetiko’ob cha’ano’ob wa máaxo’ob unaj u chikpajalo’ob tu táan wáal jump’éel piki’il ju’un”, tu ya’alaj ka t’aanaj yóok’olal Yalitza Aparicio.

Aparicioe’ leti’ máax beetik u protagonistail ti’ jump’éel cha’an beeta’an tumen mexicanoil Alfonso Cuarón, Roma. Cha’ane’ tu náajaltaj Premios Círculo de Críticos de Cine ti’ u noj kaajil Nueva York, yéetel u tuukulile’ ch’a’aban ti’ u k’a’ajesajil bix úuchik líik’il tu paalil Cuarón, ku chikbesa’al u tsikbalil Cleo, juntúul u x meyajil colonia Roma ti’ Ciudad de México.

Mexicaoe’ “ku beetik jump’éel ts’íib ti’ le ko’olelo’ob líik’sej, ts’o’okole’ ku jach chikbesik yéetel tuláakal u yóole’, bix u kuxtal sáansamal baatsilo’ob ichil u sutulsuutil ayik’al máako’ob ichil u ja’abilo’ob 70, tu’ux chika’an jejeláas político x wo’okinil yanchaj te’e k’inako’obe’”, beey u xo’okol ti’ u kúuchil Netflix.

Aparicio yéetel Marina de Tavira ku chikpajalo’ob ti’ cha’an ku xáantal ka’ap’éel hora yéetel 15 minutos, ts’o’okole’ ts’o’ok xan u ch’a’achibta’al ti’al u náajaltik óoxp’éel Globos de Oro yéetel táan xan u ketikubáaj ti’al u náajaltik Premios Oscar yéetel Goya.

Ojéelt uláak’ ba’alo’ob yóok’olal ts’íib jóok’sa’ab ti’ u pik’il ju’unil Vogue ti’ u kúuchil Internet: www.vogue.mx

Ti’al u páajtal a cha’antik k’áat chi’tsikbal beeta’abe’ je’el u páajtal a xak’altik: www.youtube.com/watch?v=SmEhcDZqrUo&feature=youtu.be