Táan u séeb sa'atal áanillos bak'pachtik Saturno: NASA

Yaan u ch'éejel ichil 300 millonesil ja'abo'ob

Notimex
Oochel NASA
K'iintsil

Miércoles 19 ti' diciembre, 2018

U kúuchil NASAe’ tu ts’áaj k’ajóotbil te’e k’iino’oba’, ti’ planeta Saturnoe’ táan u séeb sa’atal u áanillosil bak’pachtik, tumen táan u jíilta’alo’ob tumen gravedad ba’ale’ beyxan tumen u cháakil u xiixel bat.

Túumben xaak’ale’ jóok’sa’ab ti’ ba’ax chikbesa’ab tumen naves espaciales Voyager 1 yéetel 2, úuchik u máano’ob jayp’éel ja’abo’ob paachil tak tu’ux yaan Saturno, k’ajóolta’an beey “planeta anillado”.

“Táan k tukultik -u cháakil áanillose’- ku beetik u máan u ya’abil ja’il ba’alob je’el u beetik u chu’upul tak jump’éel piscina olímpica lik’ul u áanillosil Saturno ichil táanchúumuk hora”, beey úuchik u tsolik u yuumil xak’al xook, James O'Donoghue.

Tu yóok’olal le je’elo’, tu ya’alaje’, tuláakal sistema tu’ux yaan áanilloso’obe’ yaan u sa’atalo’ob ichil 300 ja’abo’ob, ba’ale’ ti’ le je’elo’ ku táak’al u xiixel ba’al ku jóok’ol ti’ u Ecuadoril Saturno.

Jump’éel ba’al ts’o’ok u xáantal káajak u k’áatchibta’al tumen aj xak’al xooko’obe’, leti’ u yojéelta’al wa ka yanchaj Saturnoe’ yanchaj xan u áanillosil wa jujump’íitil úuchik u yantal ti’, beey úuchik u ya’alal tumen Administración Nacional de la Aeronáutica y del Espacio (NASA, yóok’olal bix u k’aaba’ ich inglés).

Túuben xak’al xooke’ óoli’ ti’ ku jets’el ti’ le ts’ook tuukulo’, le beetik ma’ xaane’, áanillose’ yaan kex 100 millonesil ja’abob ti’ob,

James O'Donoghue tu tsolaj óoli’ táan chúumuk kuxtal yanik sistema de anillos, tumen ma’ mantats’ yaniko’obi’, ma’ xaan wa Júpiter, Urano yéetel Neptunoe’ yanchaj xan tu bak’pachilo’ob, ba’ale’ walkila’ chéen junchan tsool yaan tu bak’pacho’ob.

U ya’abil u áanillosil Saturnoe’ beeta’an yéetel u xóoxot’al bat, yaane’ yajan mejentak u wóowolal, yaan xane’ ku p’isik xan jayp’éel metro u kóochil.

U mejen xóoxot’aj áanillone’ ti’ ku p’áatalo’obi’ tumen ku kóolalo’ob tumen u gravedadil Saturno, tumen ku nats’ik tu yiknal, ba’ale’ u séeba’anil u sutulsuute’ ku beetik u jóok’olo’ob beey u yóol ts’oon tak espacio.

U múuch’il aj xak’al xooko’obe’ tu ya’alaj u k’áat u jach il ba’ax ku yúuchil yéetel u cháakil áanillos je’el bix u bin u k’éexel u k’iinilo’ob Saturno.

Je’el bix u bin u yáalk’ab planeta tu bak’pachil u órbitail ku xáantal 29.4 ja’abo’obe, áanillo’obe’ ku jayk’íinsikuba’ob tu táan K’iin. Luz ultravioleta ku jóok’sa’al tumen K’iine’, ku ts’áak u muuk’ bat yéetel ku beetik u núukta’al ba’al tumen u campo magnéticoil Saturno, u yantal u jejeláasil sáasil k’iine’ ku beetik u k’éexel u muuk’il cháak ku yantal te’elo’.