Ta'aytak 50 ja'abo'ob yanak yáax alunizaje, ba'ale' wíinike' yaan xak'altik Uj tuka'atéen

Chéen óoxp'éel noj lu'umo'ob ts'o'ok u béeykunsiko'ob u alunizaro'ob

Afp
Oochelo'ob Afp
K'iintsil

París, Francia
Miércoles 9 ti' enero, 2019

Ts’o’ok u máan 50 ja’abo’ob úuchik u yáax pe’ek’chabta’al Uj tumen wíinik, le je’elo’, leti’e’ satiletee’ siijil ti’ Yóok’ol Kaab, ba’ale’ te’e ja’ab 2019 yaniko’ona’ táan u péeksik u yóol tuka’atéen ichil jayp’éel lu’umo’ob tu’ux taak u beeta’al espacial xaak’alo’ob.

U ka’atéenil u túuxta’al tumen China jump’éel módulo ti’al u xak’alta’al u yóok’ kabil le ujo’, chéen paachil ti’ ba’ax tu beetaj Yutu (Conejo de Jade) ti’ u ja’abil 2013, xáanchaj táan u meyaj 31 u p’éel winalo’ob.

U sondail Chang'e-4 jáay tu táax lu’umil Aitken. Yutu-2, k’aaba’ ts’a’an ti’ robot móvile’, káaj u péek tu yóok’ kabil ma’ tu páajtal u jan ila’al wa chéen Yóok’ol Kaab yaan máak. “Je’el bixak ka úuchuke’, je’el ba’axak bíin kaxta’ak tumen chino’obe’, noj ba’al le ba’ax bíin chikpajako’”, beey úuchik u ya’alik Michel Viso, máax ku meyaj ti’ agencia espacial ti’ u lu’umil Francia CNES.

Ichil le ja’ab yaniko’ona’, u noj lu’umil Chinae’ táan u tukultik u túuxtik uláak’ jump’éel sonda (Chang'e-5) ti’al u ch’a’ak jump’íit u chíikulal le lu’um yaan te’elo’ ti’al u taasik tak wey Lu’ume’.

Tak walkila’, chéen óoxp’éel noj lu’umo’ob ts’o’ok u béeykunsiko’ob u alunizaro’ob, ti’ p’aatal kex 384 mil mil kilómetros náach ti’ Yóok’ol Kaab: Rusia, Estados Unidos yéetel China. Ts’o’okole’ kex laj ka’atúul astronautas estadunidenseilo’obe’ xíimbalnajo’ob tu yóok’ kabil le ujo’ ichil u ja’abilo’ob 1969 yéetel 1972.

U noj lu’umil Indiae’, jump’éel ti’ le lu’umo’ob ku páa’ta’al u núup’ul xan ti’ le xaak’alilo’oba’, le ken u túuxt misión Chandrayaan-2, tu’ux táan u táakbesa’al jump’éel chimes k’áak’ ti’al u beeta’al alunizaje, yaan xan u yantal obot móvil indioil yéetel jump’éel "un mini-robot europeoil beeta’an Holanda", beey úuchik u ya’alik Bernard Foing, juntúul u astrofísicoil Agencia Espacial Europea (ESA).

Táan u páa’ta’al ka túuxta’ak misión tumen u Agenciail Espacial ti’ u lu’umil India, ti’al u káajbal u winalil febrero, ichil ba’ax a’alab tumen aj xak’al xooke’, máax jo’olbesik u múuch’il internacional meyaj beetik xaak’al te’e ujo’. Ts’o’okili’ u yáax túuxta’al jump’éel yáax misión (Chandrayaan-1) ti’al o wowol suut tu bak’pachil Uj tu ja’abil 2008.

"Robótico kaaj"

U lu’umil Israele’ taak xan u táakpajal ti’ espacial xaak’al yaan u beeta’al, yéetel alunizador Beresheet 150 kilogramos u aalil, beeta’an tumen u privado mola’ayil israelí SpaceIL, jump’éel ti’ le p’áato’ob ichil u ts’ook mola’ayo’ob ti’ u ketlamil Google Lunar X Prize (GLXP).

Múuch’ilo’ob meyaj ku ketikuba’ob ti’al le je’elo’, unaj u ye’esiko’ob no’ojano’ob ti’al u beetiko’ob u jáayal jump’éel robot tu yóok’ol kabil Uj ma’ili’ máanak u k’iinil 31 ti’ marzo ti’ u ja’abil 2018. Keetile’ ts’o’okpaj kex ma’ jóok’sa’ab kex ma’ yanchaj máax náajaltikl, le beetik ma’ xan k’u’ub chíimpolal. Ba’ale’ SpaceIL láayli’ táan u meyaje’, yéetel táan u p’isbaltikubáaj ti’al u túuxtik u coheteil Falcon 9, tu winalil febrero, beeta’an tumen u estadunidenseil mola’ay SpaceX.

“U noj ba’alil misióne’, leti’ ka páatak u ye’esa’al Israele’ no’oja’an ti’al u alunizar, ti’al xan u beetik u meyaj jump’éel robot móvil yéetel beyo’ u yojéelta’al uláak’ tumben científico yéetel miatsil ba’alo’ob”, beey úuchik u ya’alik Foing.


"2019 jump’éel k’a’anan ja’ab ti’al xaak’alo’ob bíin beeta’ak te’e ujo’", tu ya’alaj. “U káajbal jump’éel robótico kaaj bíin yanak Uj, yaan u beeta’al yéetel nu’ukulo’ob túuxta’an tumen túumben noj lu’umo’ob yéetel tumen u jejeláasil máako’ob, u ya’abilo’ob koonolo’ob”.

U noj lu’umil Japóne’ táan u tukultik u túuxtik jump’éel alunizador, ku k’aaba’tik SLIM, ichil u ja’abilo’ob 2020-2021, ti’al u xak’altik tu’ux yaan u volcánica baantail ti’ u lu’umil Uj.

Beey túuno’, u lu’umil Rusiae’ láayli’ táan u meyaj yóok’olal misión robótica Luna 27 ti’al u xak’altik síis lu’um yaan Polo Sur ichil jayp’éel ja’abo’ob yéetel u yáantajil Europa.