Ku k'iimbesa'al 100 ja'abo'ob úuchik u yantal u péeksajil Bauhaus

Yaan u beeta'al jump'éel cha'an tu noj kaajil Berlín yéetel yaan u je'ebel jump'éel mueseo tu kaajil Dessau

Alondra Flores Soto
Oochel Fabrizio León Diez
K'iintsil

Jueves 10 ti' enero, 2019
Ciudad de México

Tu noj lu’umil Alemania yéetel táanxel lu’umo’obe’ táan u líik’sa’al tuláakal ba’al ti’al u beeta’al u k’iimbesajil 100 ja’abo’ob yanak u péeksajil Bauhaus, ti’al u ka’anal arquitectura, diseño, artesanía yéetel its’at, beyxan tumen leti’e’ tu’ux yanchaj ya’abach k’eexilo’ob ti’ bix u yila’al u estéticail siglo XX.

No’ojan meyaj yéetel jats’utsil ba’al, chéen jayp’éel ti’ le ba’alo’ob je’ets’ tumen artístico péeksajil kuxlaj tak tu ja’abil 1933, ja’ab úuchik u k’a’alal tumen nazio’ob. Yaan jaytúul máaxo’ob péektsiltikej bino’ob Estados Unidos. Ka’atúul tu jach chikbesajo’obe’ leti’e’ j boono’ob Vasili Kandinsky (rusoil) yéetel Paul Klee (suizoil).

Noj ba’al tu p’atajo’obe’, tu píitmansaj tak arquitectura, tumen chikpaj ichil uláak’ u jejeláasil meyajo’ob beeta’ab te’e k’iino’obe’. Ichil uláak’ máaxo’ob chikbese’ ti’ yaan Oskar Schlemmer, Kurt Schmidt, Lyonel Feininger yéetel László Moholy-Nagy.

Ma’ náach k’iin úuchik u ts’o’okol Primera Guerra Mundial, j urbanistail Walter Gropius tu káajsaj u najil xook diseño Weimar tu ja’abil 1919, yéetel u tuukilil u xa’ak’tik u yantal no’ojan meyaj yéetel estética ti’al u páajtal u k’e’exel ba’al ich kaaj. Ts’o’okole’, najil kaambale’ péeksa’ab Dessau tu ja’abil 1926, yéetel ti’al 1932 biinsa’ab Berlín.

Kúuchilo’ob yanchajo’ob te’e lu’umo’obo’ je’ets’o’ob beey Patrimonio de la Humanidad tumen Organización de las Naciones Unidas para la Educación, la Ciencia y la Cultura, tumen tukulta’abe’ jach k’a’anan ba’al ti’ modernismo clásico.

Úuchik u su’utul tak Dessau, beeta’ab jump’éel túumben kúuchil patjo’olta’ab tumen Gropius, ts’o’okole’ le je’elo’ ch’a’anukta’ab beey jump’éel ti’ u asab k’a’anan chíikulal ti’ arquitectura moderna.

Internacional mola’aye’ tu ya’alaj péektsil yanchaje’, tu ye’esaj óol yanchaj ti’al u patjo’olta’al jump’éel arquitectura tu’ux ka k’a’abéetkunsa’ak nu’ukulo’ob yanchaj te’e k’iino’obe’, le ku páajtal u yantal ti’ u ya’abil kaaj, je’el bix hormigón, vidrio yéetel acero, ts’o’okole’ jel chíimpolta’ab le bix u beeta’al construcción ka’achij.

Ichil u k’iinil 16 tak 24 ti’ eneroe’, yaan u beeta’al tu noj kaajil Berlín u internacional cha’anil ¡Arriba el telón!, meyaj yaan u káajal yéetel k’iimbesajo’ob tu yóok’olal u centenarioil péektsil yéetel yaan xan u ye’esa’al meyajo’ob beeta’an tumen aj its’ato’ob ti’ le k’iino’oba’, máaxo’ob tu ch’a’ajoltajo’ob estético tuukul ti’ le péektsil yanchaj 100 ja’abo’ob paachil. Tukulta’an u yantal jejeláas e’esajilo’ob, instalaciono’ob, balts’am, u k’aayil ópera, óok’ot, paax, cha’an, xak’al tsikbalo’ob yéetel kaambal.

Jump’éel ti’ le ba’ax yaan u k’iimbesas’ale’, leti’e’ túumben Museo Bauhaus tu kaajil Dessau, yaan u je’ebel tu winalil septiembre ti’ u ja’abil 2019, yéetel jump’éel u ye’esajil nu’ukulo’ob suuk u k’a’abéetkunsa’al sáansamal ich u kuxtal máak, je’el bix muebles yéetel arquitéctonico ba’alo’ob.

Tu Noj Kaajil Méxicoe’ ku páajtal u k’ajóolta’al u meyajil Vasili Kandinsky, máax ka’ansajnaj ti’ u najil xook Bauhaus, yéetel u ye’esajil Pequeños mundos, ts’a’aban tu kúuchil Palacio de Bellas Artes. Kex tumen ma’ ya’ab chikbesa’an

Tu ja’abil 1921e’, j boone’ páayt’anta’ab ti’al u ts’áak xook Weimar, tu’ux t’aanaj yóok’olal abstracción y teoría del diseño y el color, beyxan t’aanaj yóok’olal sicología en la percepción cromática. Te’e kúuchil xano’, múul yanchaj yéetel Paul Klee, máax ts’íibnaj tu yóok’olal u teoríail configuración pictórica.